ပြည်ထောင်စုတရားသူကြီးချုပ်ရုံးနှင့်အိန္ဒိယနိုင်ငံ ၊ အမျိုးသားတရားစီရင်ရေး အကယ်ဒမီတို့အကြားရေးထိုးထားသည့် နားလည်မှုစာချွန်လွှာအရ “ITEC မိတ်ဖက်နိုင်ငံများမှတရားသူကြီးများအတွက် စွမ်းဆောင်ရည်မြှင့်တင်မှုသင်တန်း (မြန်မာ)”သို့ တက်ရောက်ရန်ဒဿမအကြိမ်အဖြစ် သင်တန်းသား (၄၀) ဦးစေလွှတ်

နေပြည်တော်၊ နိုဝင်ဘာ ၂၁

အိန္ဒိယနိုင်ငံ၊ မတ်ဒရာပရာဒက်ရှ်ပြည်နယ်၊ ဘိုပါးမြို့ရှိ အမျိုးသားတရားစီရင်ရေး အကယ်ဒမီ (National Judicial Academy-NJA) တွင် ၂၀၂၆ ခုနှစ်၊ နိုဝင်ဘာလ ၂၃ ရက်နေ့မှ ၂၇ ရက်နေ့အထိ ဒဿမအကြိမ်မြောက်အဖြစ်ဖွင့်လှစ်မည့် “ITEC မိတ်ဖက် နိုင်ငံများမှ တရားသူကြီးများအတွက် စွမ်းဆောင်ရည်မြှင့်တင်မှုသင်တန်း (မြန်မာ)” သို့ တက်ရောက်ရန် ပြည်ထောင်စုတရားလွှတ်တော်ချုပ်မှ ပြည်နယ်တရားရေးဦးစီးမှူး၊ ဒုတိယ ညွှန်ကြားရေးမှူးများ၊ လက်ထောက်ညွှန်ကြားရေးမှူးများ၊ ဦးစီးအရာရှိများ၊ ခရိုင်အဆင့်နှင့် မြို့နယ်အဆင့်တရားသူကြီးများ၊ တရားရေးအရာရှိများ ပါ၀င်သည့်သင်တန်းသား (၄၀) ဦး သည် ၂၀၂၆ ခုနှစ် နိုဝင်ဘာလ ၂၁ ရက်နေ့၊ ၀၆:၂၀ နာရီ အချိန်တွင် ရန်ကုန်အပြည်ပြည်ဆိုင်ရာ လေဆိပ်မှထွက်ခွာသည်။

သင်တန်းသားများသည် အဆိုပါသင်တန်း၌ အိန္ဒိယနိုင်ငံဖွဲ့စည်းပုံအခြေခံဥပဒေ၊ အိန္ဒိယနိုင်ငံတရားစီရင်ရေးစနစ်၊ တရားသူကြီးကျင့်ဝတ်၊ စီရင်ချက်ရေးသားခြင်း၊ တရားရုံး စီမံခန့်ခွဲမှု၊ သက်​သေခံဥပဒေ၊ တရားမနှင့်ရာဇဝတ်မှုများ စစ်ဆေးစီရင်ရာတွင်မှုခင်းဆေး ပညာ၊ သဘာဝပတ်ဝန်းကျင်နှင့်တောရိုင်းတိရိစ္ဆာန်အကာအကွယ်ပေးရာတွင် တရားစီရင်ရေး ကဏ္ဍ၊ အခြားသောနည်းလမ်းဖြင့် အငြင်းပွားမှုဖြေရှင်းခြင်း၊ ရာဇဝတ်မှုခင်းများ စီမံခန့်ခွဲခြင်း၊ အီလက်ထရောနစ်နည်းလမ်းဖြင့် ကျူးလွန်သည့် ပြစ်မှုများနှင့် ဉာဏ်ရည်တုနည်းပညာနှင့် တရားစီရင်ရေးဆိုင်ရာကြီးကြပ်မှုတို့ကို လေ့လာသင်ယူခွင့်ရရှိကြမည့်အပြင် လေ့လာရေး ခရီးအဖြစ် အိန္ဒိယနိုင်ငံ၊ ဘိုပါးမြို့ရှိတရားရုံးများ၊ ယဉ်ကျေးမှုပြတိုက်၊ တိုင်းရင်းသားများ      ပြတိုက်၊ လှေလှော်အသင်းနှင့် ယူနက်စကိုကမ္ဘာ့ယဉ်ကျေးမှုအမွေအနှစ်စာရင်းဝင်ပုထိုးတော် ကြီးတည်ရှိရာနေရာ ဘိုပါး၊ ဆန်းချီမြို့သို့လည်းသွားရောက်လေ့လာခွင့်ရရှိမည်ဖြစ်သည်။

အဆိုပါ သင်တန်းအစီအစဉ်သည် ပြည်ထောင်စုတရားသူကြီးချုပ်ရုံးနှင့် အိန္ဒိယနိုင်ငံ၊ အမျိုးသားတရားစီရင်ရေးအကယ်ဒမီတို့အကြား ၂၀၁၈ ခုနှစ် တွင်လက်မှတ်ရေးထိုးထား သည့် မြန်မာနိုင်ငံမှတရားသူကြီးများနှင့် တရားရေးအရာရှိများအားအိန္ဒိယနိုင်ငံသို့စေလွှတ်၍ သင်တန်းပေးခြင်းနှင့် စွမ်းဆောင်ရည်မြှင့်တင်ခြင်းဆိုင်ရာနားလည်မှုစာချွန်လွှာအရ စေလွှတ် ခြင်းဖြစ်ပြီး၊ ယခု ဒဿမအကြိမ်မြောက်သင်တန်းအပါအဝင်စုစုပေါင်းသင်တန်းသား ၄၀၀ ဦး စေလွှတ်ခဲ့ပြီးဖြစ်သည်။