နေပြည်တော်၊ နိုဝင်ဘာ ၂၀
ပြည်ထောင်စုတရားလွှတ်တော်ချုပ်၏ (၂၁) ကြိမ်မြောက် ကထိန်လျာသင်္ကန်းဆက်ကပ်လှူဒါန်းပွဲ အခမ်းအနားကို ယနေ့နံနက် (၀၆:၃၀) နာရီအချိန်က ပြည်ထောင်စုတရားလွှတ်တော်ချုပ်၊ Judicial College ၌ ကျင်းပပြုလုပ်ရာ ရှေးဦးစွာ ကြွရောက်လာကြသော ဆရာတော်သံဃာတော်အရှင်သူမြတ်တို့အား ပြည်ထောင်စုတရားသူကြီးချုပ်နှင့် ပြည်ထောင်စုတရားလွှတ်တော်ချုပ်တရားသူကြီးများက အရုဏ်ဆွမ်း ဆက်ကပ်လှူဒါန်းကြသည်။
ထို့နောက် အခမ်းအနားကို နမောတဿသုံးကြိမ်ရွတ်ဆို၍ဖွင့်လှစ်ပြီး တက်ရောက်လာသည့် ဧည့်ပရိတ်သတ်အပေါင်းက ဆရာတော်သံဃာတော်အရှင်သူမြတ်တို့ထံမှ ငါးပါးသီလခံယူ ဆောက်တည်ကြသည်။ ကြွရောက်လာကြသည့် ဇေယျသိမ်ကျောင်းတိုက်၊ ဇမ္ဗူအေးကျောင်း တိုက်နှင့် လမ်းသပြေကုန်း ကျောင်းတိုက်တို့မှ ဆရာတော်သံဃာတော်အရှင်သူမြတ် (၉) ပါးတို့အား ပြည်ထောင်စုတရား သူကြီးချုပ်ဦးသာဌေးနှင့် ပြည်ထောင်စုတရားလွှတ်တော်ချုပ် တရားသူကြီးများက ကထိန်လျာသင်္ကန်းနှင့် လှူဖွယ်ဝတ္ထုပစ္စည်းများ ဆက်ကပ်လှူဒါန်းပူဇော်ကြသည်။
ဆက်လက်၍ ဇေယျသိမ်ကျောင်းတိုက်ဆရာတော် ဦးဝိစိတ္တလင်္ကာရက ကထိန်လျာသင်္ကန်းလှူဒါန်းခြင်းနှင့်ပတ်သက်၍ အနုမောဒနာတရားဟောကြားချီးမြှင့်ပြီး လှူဒါန်းမှုအစုစုအတွက် ရေစက်သွန်းချအမျှပေးဝေကာ အခမ်းအနားကို ဗုဒ္ဓသာသနံစိရံတိဌတု သုံးကြိမ်ရွတ်ဆို၍ ရုပ်သိမ်းခဲ့သည်။ ကထိန်လျာသင်္ကန်းဆက်ကပ်လှူဒါန်းရာတွင် ပစ္စည်းနှင့်အလှူငွေ စုစုပေါင်းတန်ဖိုးမှာ (၇၂,၃၉၉,၃၀၀) ကျပ် ဖြစ်သည်။

