နေပြည်တော်၊ ဩဂုတ် ၁၇
ပြည်ထောင်စုတရားလွှတ်တော်ချုပ်က ကြီးမှူး၍ ရှေ့နေရှေ့ရပ်များအတွက် AML/CFT/CPF သင်တန်းဖွင့်ပွဲကို Hotel Max နေပြည်တော်၌ ၁၅-၈-၂၀၂၆ ရက်နေ့ နံနက်ပိုင်းတွင် ကျင်းပပြုလုပ်ရာ ပြည်ထောင်စုတရားသူကြီးချုပ် ဦးသာဌေး တက်ရောက်၍ အမှာစကား ပြောကြားသည်။
သင်တန်းဖွင့်ပွဲသို့ ပြည်ထောင်စုတရားလွှတ်တော်ချုပ်မှ တရားသူကြီးများ၊ ညွှန်ကြားရေးမှူးချုပ်နှင့်တာဝန်ရှိသူများ၊ ခရိုင်အဆင့်တရားသူကြီးများ၊ AML/ CFT လုပ်ငန်းအဖွဲ့ ဒုတိယဥက္ကဋ္ဌ၊ တရားလွှတ်တော်ရှေ့နေများကောင်စီ ဒုတိယဥက္ကဋ္ဌနှင့် အတွင်းရေးမှူး၊ ငွေကြေးဆိုင်ရာစုံစမ်းထောက်လှမ်းရေးအဖွဲ့၊ အထူးစုံစမ်းစစ်ဆေးရေးဦးစီးဌာန၊ သင်တန်းပို့ချမည့်သူများ တက်ရောက်ကြသည်။
သင်တန်းတွင် ငွေကြေးခဝါချမှု၊ အကြမ်းဖက်မှုနှင့် လူအများအပြား သေကျေစေသည့် လက်နက်ပြန့်ပွားရေးကို ငွေကြေးထောက်ပံ့မှုတိုက်ဖျက်ရေးဆိုင်ရာ အပြည်ပြည်ဆိုင်ရာနှင့် ပြည်တွင်းဥပဒေမူဘောင်နှင့် တာဝန်များ၊ ရှေ့နေရှေ့ရပ်များ၏ အခန်းကဏ္ဍနှင့် ကြီးကြပ်ရေးအာဏာပိုင်၏ လုပ်ငန်းများကို ပြည်ထောင်စုတရားလွှတ်တော်ချုပ်၊ ငွေကြေးဆိုင်ရာစုံစမ်းထောက်လှမ်းရေးအဖွဲ့၊ အထူးစုံစမ်းစစ် ဆေးရေးဦးစီးဌာန၊ မြန်မာနိုင်ငံတော်ဗဟိုဘဏ်မှ တာဝန်ရှိသူများက ဆွေးနွေးပို့ချပြီး တက်ရောက်သူများကလည်း ပါဝင်ဆွေးနွေးခြင်း အတွေ့အကြုံ မျှဝေခြင်းတို့ ပြုလုပ်ကြသည်။
သင်တန်းသို့ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ဧရာဝတီတိုင်းဒေသကြီး၊ ပဲခူးတိုင်းဒေသကြီး၊ နေပြည်တော်ကောင်စီနယ်မြေ၊ ကရင်ပြည်နယ်နှင့် ရှမ်းပြည်နယ်တို့မှ ရှေ့နေရှေ့ရပ်များ စုစုပေါင်း ( ၂၅၁ ) ဦး တက်ရောက်ကြ၍ သင်တန်းပြီးမြောက်ကြောင်းလက်မှတ်များကို ပြည်ထောင်စုတရားသူကြီးချုပ်နှင့် ပြည်ထောင်စုတရားလွှတ်တော်ချုပ် တရားသူကြီးများက ပေးအပ်ချီးမြှင့်သည်။
အဆိုပါသင်တန်းသည် ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ အမျိုးသားအဆင့်မဟာဗျူဟာ (၂၀၂၄-၂၀၂၈) နှင့် ပြည်ထောင်စုတရားလွှတ်တော်ချုပ် AML/CFT အမျိုးသားအဆင့် မဟာဗျူဟာဆိုင်ရာလုပ်ငန်း အစီအစဉ် (၂၀၂၆ ခုနှစ်) ၏ လုပ်ငန်းအစီအစဉ် ၂.၆.၂၊ ၃.၁.၁၊ ၃.၂.၂.၊ ၃.၂.၄၊ ၃.၃.၂ တို့အရ ဆောင်ရွက်ပေးခြင်းဖြစ်သည်။
