နေပြည်တော်၊ ဧပြီ ၂၂

၂၀၂၅ ခုနှစ်၊ မတ်လ ၂၈ ရက်နေ့တွင် လှုပ်ခတ်ခဲ့သော မန္တလေးငလျင်ကြီးကြောင့် ပြည်ထောင်စုတရားလွှတ်တော်ချုပ်ပင်မအဆောက်အဦ၌ ထိခိုက်ပျက်စီးဆုံးရှုံးမှုများ ကြီးမားစွာဖြစ်ပေါ်ခဲ့သောကြောင့် ပြည်ထောင်စုတရားလွှတ်တော်ချုပ်တရားခွင်များကို ဇေယျာသီရိခရိုင်တရားရုံးသို့ ပြောင်းရွှေ့ရုံးထိုင်မည်ဖြစ်သဖြင့် ပြည်ထောင်စုတရားသူကြီးချုပ်ဦးသာဋ္ဌေးသည် ယနေ့နံနက် ၀၉း၃၀ နာရီအချိန်တွင် ဇေယျာသီရိခရိုင်တရားရုံးသို့ရောက်ရှိပြီး ပြည်ထောင်စုတရားလွှတ်တော်ချုပ်တရားခွင်များဖြစ်သည့် စုံညီခုံရုံး၊ အထူးအယူခံခုံရုံး၊ အထူးခုံရုံး၊ ရာဇဝတ်ဆိုင်ရာနှင့်တရားမဆိုင်ရာ အယူခံ/ပြင်ဆင်မှုများအတွက် ရုံးထိုင်မည့် တရားခွင်များ ပြင်ဆင်ထားရှိမှုကို လှည့်လည်ကြည့်ရှုစစ်ဆေးခဲ့သည်။

ထိုသို့စစ်ဆေးရာတွင် အမြဲတမ်းအတွင်းဝန်နှင့်တာဝန်ရှိသူများက စုံညီခုံရုံး၊ အထူးအယူခံခုံရုံး၊ အထူးခုံရုံးနှင့် အယူခံ/ပြင်ဆင်ရုံးများအတွက် ရုံးထိုင်ရန် ပြင်ဆင်ဆောင်ရွက်ထားသည့် အခြေအနေ၊ တရားသူကြီးများအတွက်နားနေခန်းထားရှိမှုအခြေအနေနှင့် ဒုတိယညွှန်ကြားရေးမှူးများနှင့် အရာထမ်းအမှုထမ်းများရုံးထိုင်မည့်အခြေအနေတို့ကို လိုက်လံရှင်းလင်းပြသရာ ပြည်ထောင်စုတရားသူကြီးချုပ်က ယာယီတရားခွင်များဖြစ်သော်လည်း တရားခွင်အဆင့်အတန်းမီအောင် ဆောင်ရွက်ရမည်ဖြစ်ကြောင်း၊ တရားရုံးဥပဓိရုပ်ကောင်းမွန်ရန်လိုအပ်ကြောင်း၊ open court ဖြစ်သည့်အတွက် အမှုသည်များ၊ ရှေ့နေများ၊ အမြင့်ဆုံးတရားရုံး၏ တရားစီရင်မှုကိုလေ့လာလိုသူများနှင့် သတင်းမီဒီယာများကိုလည်း တရားခွင်အတွင်း ဝင်ရောက်လေ့လာခွင့်ပြုရမည်ဖြစ်ကြောင်း၊ သို့ဖြစ်၍ပြင်ဆင်ဆောင်ရွက်မှုများကို ဘက်ပေါင်း စုံမှစဉ်းစားဆောင်ရွက်ရန်လိုအပ်ကြောင်းနှင့် ကြီးမားသည့်ငလျင်ဘေးဒဏ်ကြုံကြိုက်ခဲ့ကြရ သော်လည်း တရားစီရင်ရေးကိုရပ်တန့်မှုမရှိအောင် ကြိုးစားဆောင်ရွက်ခဲ့ကြသော အရာထမ်း၊ အမှုထမ်းများကို ဂုဏ်ပြုမှတ်တမ်းတင်ပါကြောင်း ပြောကြားပါသည်။

ပြည်ထောင်စုတရားလွှတ်တော်ချုပ်သည် ပြည်သူများ၏ ဥပဒေပါအခွင့်အရေးများ နစ်နာဆုံးရှုံးမှုမဖြစ်ပေါ်စေရေးအတွက် ရုံးဖွင့်ရက်များတွင် ပြည်ထောင်စုတရားလွှတ်တော်ချုပ်သို့ တင်သွင်းမည့်အမှုများကို ပြည်ထောင်စုတရားလွှတ်တော်ချုပ်၏ အမှုလက်ခံကောင်တာ၌ ယခင်အတိုင်းလက်ခံဆောင်ရွက်ပေးလျက်ရှိပြီး ကြိုတင်သတိပေးအမှုခေါ်စာရင်းနှင့် ရုံးခန်းတွင်းဆောင်ရွက်ချက်၊ ရုံးထိုင်ဆောင်ရွက်ချက်များကို ပြည်ထောင်စုတရားလွှတ်တော်ချုပ်နှင့် တိုင်းဒေသကြီး/ပြည်နယ်တရားလွှတ်တော်များ၏ ကြော်ငြာသင်ပုန်းများတွင်လည်းကောင်း၊ ဇေယျာသီရိခရိုင်တရားရုံးကြော်ငြာသင်ပုန်းတွင်လည်းကောင်း၊ ပြည်ထောင်စုတရားလွှတ် တော်ချုပ်၏ website ဖြစ်သည့် www.unionsupremecourt.gov.mm  တွင်လည်းကောင်း ကြည့်ရှုနိုင်ပြီး ၂၃-၄-၂၀၂၅ ရက်နေ့မှစ၍ ပြည်ထောင်စုနယ်မြေ၊ နေပြည်တော်၊ ပုဗ္ဗသီရိမြို့နယ်၊ မင်္ဂလာဒီပရပ်ကွက်၊  ချင်းတွင်းလမ်းရှိ ဇေယျာသီရိခရိုင်တရားရုံး(ဖုန်း-၀၆၇-၄၅၁၀၂၄၂)၌ တရားခွင်များဖွင့်လှစ်ပြီး ကြားနာခြင်း၊ အမိန့်ချမှတ်ခြင်းများကို ရုံးထိုင် ဆောင်ရွက်သွားမည်ဖြစ်ကြောင်း သိရှိရသည်။