နေပြည်တော်၊ ဧပြီ ၆
၂၀၂၅ ခုနှစ်၊ မတ်လ ၂၈ ရက်နေ့တွင်ဖြစ်ပွားခဲ့သည့် မြေငလျင်ဒဏ်ကြောင့် ပြည်ထောင်စု တရားလွှတ်တော်ချုပ်ရုံးရှိတရားခွင်များ ထိခိုက်ပျက်စီးမှုဖြစ်ပေါ်ခဲ့သဖြင့် အများပြည်သူတို့၏ ဥပဒေပါအခွင့်အရေးများ မဆုံးရှုံးစေရန်အတွက် ပြည်ထောင်စုတရားလွှတ်တော်ချုပ်၌ အမှုများ ကြားနာခြင်းကို ပုံမှန်ဆောင်ရွက်နိုင်ရန်အလို့ငှာ ပြည်ထောင်စုတရားသူကြီးချုပ်ဦးသာဌေးနှင့် အဖွဲ့သည် ၂၀၂၅ ခုနှစ်၊ ဧပြီလ ၆ ရက် ၀၉၅၀ နာရီ အချိန်တွင် ဇေယျာသီရိခရိုင် တရားရုံးသို့ရောက်ရှိပြီး ပြည်ထောင်စုတရားလွှတ်တော်ချုပ် စုံညီခုံရုံး၊ အထူးအယူခံခုံရုံး၊ အထူးခုံရုံး၊ တရားမတစ်ဦးထိုင်တရားခွင်၊ ပြစ်မှုတစ်ဦးထိုင်တရားခွင်များ ရုံးထိုင်စစ်ဆေးကြားနာရန် တရားခွင်နေရာများကို ကြည့်ရှုစစ်ဆေးခဲ့သည်။ ထို့နောက် ခရိုင်တရားရုံးနောက်ဘက်ရှိမြေ နေရာတွင် ဇေယျာသီရိခရိုင်တရားရုံး ရုံးထိုင်ရန် ယာယီတရားခွင် (၄) ခွင်ဆောက်လုပ်မည့် နေရာကိုလည်း လှည့်လည်ကြည့်ရှုစစ်ဆေးခဲ့သည်။ ဆက်လက်၍ ဇေယျာသီရိခရိုင်တရားရုံးနှင့် ပုဗ္ဗသီရိမြို့နယ်တရားရုံးများတွင် မြေငလျင်ဒဏ်ကြောင့် အနည်းငယ်ထိခိုက်ပျက်စီးမှုများကို ကြည့်ရှုစစ်ဆေးပြီး ပြုပြင်ရန်လိုအပ်သည်များကို လမ်းညွှန်မှာကြားကာ ဝန်ထမ်းနေရာချထားမှု အခြေအနေများကို လိုက်လံကြည့်ရှုအားပေးခဲ့ပါသည်။
ပြည်ထောင်စုတရားသူကြီးချုပ်နှင့်အတူ အမြဲတမ်းအတွင်းဝန်၊ ညွှန်ကြားရေး မှူးချုပ်(စီမံ)၊ ဒုတိယညွှန်ကြားရေးမှူးချုပ်(တရားစီရင်ရေး)၊ ညွှန်ကြားရေးမှူး (ပြစ်မှု၊ တရားမ) နှင့် တာဝန်ရှိသူများ လိုက်ပါခဲ့ကြောင်း သတင်းရရှိသည်။
