နေပြည်တော်၊ ဧပြီ ၁၁
ပြည်ထောင်စုတရားလွှတ်တော်ချုပ်၊ ရုံးခန်းအမှတ် (၂) တွင် (၁၂) ကြိမ်မြောက် Video Conferencing စနစ်ဖြင့် တရားလွှတ်တော်ရှေ့နေ အသိအမှတ်ပြုလက်မှတ်ပေးအပ်သည့် အခမ်းအနားကို ယနေ့နံနက် (၈:၀၀) အချိန်တွင် ကျင်းပပြုလုပ်ခဲ့သည်။
အဆိုပါ အခမ်းအနားသို့ ပြည်ထောင်စုတရားလွှတ်တော်ချုပ်တရားသူကြီးများဖြစ်ကြသော ဒေါ်ခင်မေရီနှင့် ဦးသောင်းနိုင်တို့ တက်ရောက်ကြပြီး ပြည်ထောင်စုတရားလွှတ်တော်ချုပ် တရားသူကြီးဒေါ်ခင်မေရီက အမှာစကားပြောကြားသည်။ Video Conferencing ဖြင့် အထက်တန်းရှေ့နေ (၂၂၇) ဦးတို့ တက်ရောက်ပြီး နေပြည်တော်ကောင်စီနယ်မြေအတွင်းမှ အထက်တန်းရှေ့နေ (၁၇) ဦးတို့က ကိုယ်တိုင်တက်ရောက်ကြသည်။ အထက်တန်းရှေ့နေ စုစုပေါင်း (၂၄၄) ဦးတို့အား တရားလွှတ်တော်ရှေ့နေ အသိအမှတ်ပြုလက်မှတ်များ ပေးအပ်ပြီးနောက် တရားလွှတ်တော်ရှေ့နေ အသိအမှတ်ပြုလက်မှတ်ရရှိသူများက ကတိသစ္စာပြုကြသည်။
အခမ်းအနားသို့ ပြည်ထောင်စုတရားစီရင်ရေးကြီးကြပ်မှုရုံးမှ တာဝန်ရှိသူများ တက်ရောက်ကြသည်။
