နေပြည်တော်၊ ဖေဖော်ဝါရီ ၂၄                                                       

ပြည်ထောင်စုတရားလွှတ်တော်ချုပ်၊ ပြည်ထောင်စုတရားစီရင်ရေးကြီးကြပ်မှုရုံး အစည်းအဝေးခန်းမတွင် တရားသူကြီးများအတွက် ငွေရေးကြေးရေးမဟုတ်သော စီးပွားရေးလုပ်ငန်းများနှင့် ကျွမ်းကျင်မှုဆိုင်ရာ အသက်မွေးဝမ်းကျောင်းပြုသူ (DNFBPs) များအပေါ် ငွေကြေးခဝါချမှုဆိုင်ရာ ဆုံးရှုံးနိုင်ခြေအန္တရာယ်အခြေပြု လုပ်ငန်းခွင်ပြင်ပကြီးကြပ်ခြင်း (Offsite Monitoring)၊ လုပ်ငန်းခွင်အတွင်း ဝင်ရောက်စစ်ဆေးခြင်း (Onsite Inspection) တို့နှင့် ဆုံးရှုံးနိုင်ခြေအန္တရာယ်အကဲဖြတ်ခြင်း အသိပညာပေးသင်တန်းကို ၂၀၂၃ ခုနှစ်၊ ဖေဖော်ဝါရီလ ၂၂ ရက်နေ့ မွန်းလွဲ ၅:၀၀ နာရီအချိန်တွင် ကျင်းပပြုလုပ်ခဲ့သည်။

အဆိုပါသင်တန်းတွင် ပြည်ထောင်စုတရားလွှတ်တော်ချုပ်၊ ပြည်ထောင်စုတရားစီရင်ရေးကြီးကြပ်မှုရုံး၊ ညွှန်ကြားရေးမှူးချုပ် ဒေါ်တင်နွယ်စိုးက အမှာစကားပြောကြားခဲ့သည်။ ရှေ့နေရှေ့ရပ်နှင့်စစ်ဆေးရေးဌာန၊ ညွှန်ကြားရေးမှူး ဒေါ်စောရွှေက လုပ်ငန်းခွင်ပြင်ပကြီးကြပ်ခြင်း၊ လုပ်ငန်းခွင်အတွင်း ဝင်ရောက်စစ်ဆေးခြင်းလုပ်ငန်းစဉ်များကိုလည်းကောင်း၊ ငွေကြေးခဝါချမှုတိုက်ဖျက်ရေးဌာနစုမှ လက်ထောက်ညွှန်ကြားရေးမှူး ဒေါ်ဇင်ဇင်ခိုင်က ဆုံးရှုံးနိုင်ခြေအန္တရာယ်အကဲဖြတ်ခြင်းလုပ်ငန်းစဉ်များကိုလည်းကောင်း အသီးသီးပို့ချခဲ့သည်။

အဆိုပါသင်တန်းသို့ ပြည်ထောင်စုတရားစီရင်ရေးကြီးကြပ်မှုရုံးမှ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ ဒုတိယညွှန်ကြားရေးမှူးများ၊ ငွေကြေးခဝါချမှု တိုက်ဖျက်ရေးဌာနစုမှ လက်ထောက်ညွှန်ကြားရေးမှူးများနှင့် ရုံးဝန်ထမ်းများစုစုပေါင်း (၃၃) ဦး တက်ရောက်ခဲ့သည်။

တိုင်းဒေသကြီးတရားရေးဦးစီးမှူးများနှင့် ပြည်နယ်တရားရေးဦးစီးမှူးများ၊ ခရိုင်တရားသူကြီး များနှင့် တိုင်းဒေသကြီးတရားလွှတ်တော်/ပြည်နယ်တရားလွှတ်တော်များမှ ငွေကြေးခဝါချမှု တိုက်ဖျက်ရေးလုပ်ငန်းဆောင်ရွက်မည့် ဒုတိယညွှန်ကြားရေးမှူးများ၊ လက်ထောက်ညွှန်ကြားရေးမှူးများနှင့် ရုံးဝန်ထမ်းစုစုပေါင်း (၂၁၃) ဦးက Video Conferencing စနစ်ဖြင့် ပါဝင်တက်ရောက်ခဲ့သည်။