ဒုတိယမြို့နယ်တရားသူကြီးများ ကျမ်းသစ္စာပြုခြင်းအခမ်းအနားကျင်းပ

နေပြည်တော်     ဒီဇင်ဘာ     ၁၄

 ဒုတိယမြို့နယ်တရားသူကြီးများ လုပ်ငန်းဝင်သင်တန်းအမှတ်စဉ်(၂၄)တွင် ထူးချွန်ဆုရရှိသူများအား ဂုဏ်ပြုဆုချီးမြှင့်ခြင်း၊ တာဝန်ပေးအပ်လွှာများအပ်နှင်းခြင်းနှင့် ကျမ်းသစ္စာပြုခြင်းအခမ်းအနားကို ယနေ့နံနက် ၈:၃၀ နာရီအချိန်   ပြည်ထောင်စုတရားလွှတ်တော်ချုပ်ရုံး စုဝေးခန်းမတွင်ကျင်းပရာ   ပြည်ထောင်စုတရားသူကြီးချုပ် ဦးထွန်းထွန်းဦး တက်ရောက်ခဲ့ပါသည်။

           

   အခမ်းအနား၌ ပြည်ထောင်စုတရားသူကြီးချုပ် ဦးထွန်းထွန်းဦးက အမှာစကား ပြောကြားရာတွင် တရားသူကြီးများဟာ တရားစီရင်ရေးမဏ္ဍိုင်တည့်မတ်ဖို့အတွက် အဓိက တာဝန်ရှိသူများဖြစ်ကြောင်း ၊ တရားသူကြီးများဟာ တရားစီရင်ရေးဆိုင်ရာ ကျင့်ဝတ်များ ဖြစ်တဲ့ လွတ်လပ်စွာ တရားစီရင်ခြင်း ၊ ဘက်လိုက်မှုကင်းခြင်း ၊ သာတူညီမျှမှုရှိခြင်း ၊ စွမ်းရည်ပြည့်စုံခြင်း နှင့် လုံ့လဝီရိယရှိခြင်း ၊ သမာသမတ်ကျမှုရှိခြင်း ၊ ဖြောင့်မတ်တည်ကြည်မှုရှိခြင်း ၊ ဂုဏ်သိက္ခာရှိခြင်း နှင့် ကိုယ်ချင်းစာစိတ် ရှိခြင်းတို့နှင့် ပြည့်စုံအောင်ကြိုးစားအားထုတ်ဖို့လိုမည်ဖြစ်ကြောင်း ၊အထူးမှာကြားလိုသည်မှာလာဘ်ပေး လာဘ်ယူကင်းရှင်းဖို့ ဖြစ်ကြောင်း၊ ပြည်သူရဲ့အကူအညီကိုယူပြီး ထိရောက်စွာတားဆီးသွားမှာဖြစ်သည်ကို သတိပေးပြောကြားလိုကြောင်း ၊ တရားစီရင်ရေးမဏ္ဍိုင်အပေါ်မှာ စိန်ခေါ်မှုများရှိနေပြီး သတ္တိရှိရှိရင်ဆိုင် လုပ်ဆောင်သွားကြဖို့မှာကြားလိုပါကြောင်း ပြောကြားခဲ့ပြီး ဒုတိယမြို့နယ်တရားသူကြီးများက ကျမ်းသစ္စာ ကျိန်ဆိုကြပါသည်။ ဆက်လက်၍ ပြည်ထောင်စုတရားသူကြီးချုပ်က သင်တန်းတွင် ထူးချွန်ဆု ရရှိသူများကို ဆုတံဆိပ်များ ချီးမြှင့်ပေးအပ်ခဲ့ပါသည်။

           

   ယနေ့ကျင်းပသည့် အခမ်းအနားသို့  ပြည်ထောင်စုတရားလွှတ်တော်ချုပ် တရားသူကြီးများ ၊ ညွှန်ကြားရေးမှူးချုပ်များ ၊ ဒုတိယညွှန်ကြားရေးမှူးချုပ်များ ၊ ညွှန်ကြားရေးမှူးများ ၊ သင်တန်းဆင်း ဒုတိယမြို့နယ်တရားသူကြီး (၈၀) ဦးတို့ တက်ရောက်ခဲ့ကြပါသည်။

Myanmar

Category: